လူစည်ကားရာနေရာများတွင် အင်တာနက်လိုင်းမလိုဘဲ အိတ်ဆောင်ကွန်ပျူတာ၊ မိုဘိုင်းဖုန်းများဖြင့် စာအုပ်များ ဖတ်ရှုနိုင်မည့် Public Digital Library ဝန်ဆောင်မှု ဆောင်ရွက်မည်

တိုင်းဒေသကြီးနှင့် ပြည်နယ်များအတွင်း လူစည်ကားရာနေရာများတွင် အင်တာနက်လိုင်း မလိုအပ်ဘဲ အိတ်ဆောင်ကွန်ပျူတာနှင့် မိုဘိုင်းဖုန်းများဖြင့် စာအုပ်ပေါင်း ၂၀၀၀၀ နီးပါးကို ထုတ်လွှင့်ပေးမည့် Public Digital Library ကို ဆောင်ရွက်မည်ဖြစ်ကြောင်း ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးအောင်ကြည်က ပြောသည်။

အဆိုပါ အခမဲ့ကြည့်ရှုနိုင်သော Public Digital Library Service 200 ကို ဆောင်ရွက်ပေးမည်ဖြစ်ကြောင်း သိရသည်။ တိုင်းဒေသကြီး၊ ပြည်နယ်၊ ခရိုင်ရုံးများတွင် ဖွင့်လှစ်ထားသော ပြည်သူ့စာကြည့်တိုက် ၁၀၀ ၌ စာဖတ်ပရိသတ်ပြည်သူများ အင်တာနက် အခမဲ့ သုံးစွဲနိုင်ရေးအတွက် ကြိုးမဲ့အင်တာနက်စနစ် (Wi-Fi) များ တပ်ဆင်၍ ဝန်ဆောင်မှုပေးခြင်းကိုလည်း ဆောင်ရွက်မည်ဖြစ်ကြောင်း ပြည်ထောင်စုဝန်ကြီးက ပြောသည်။

 ပြည်ထောင်စုလွှတ်တော် အစည်းအဝေး တတိယနေ့တွင် ပြောကြားခဲ့ခြင်းဖြစ်ကြောင်း သိရသည်။ ၂၀၁၄-၂၀၁၅ ဘဏ္ဍာနှစ် အမျိုးသား စီမံကိန်းဥပဒေကြမ်းနှင့် စပ်လျဉ်း၍ သက်ဆိုင်ရာကဏ္ဍအလိုက် ပါဝင်သော ပြည်ထောင်စု အဆင့်ဌာန၊ အဖွဲ့အစည်းများ၏ မူဝါဒ၊ ရည်မှန်းချက်၊ လုပ်ငန်းစဉ်များ၊ နိုင်ငံပိုင်အခန်းကဏ္ဍ ရင်းနှီးမြုပ်နှံမှု လျာထားချက်များကို သက်ဆိုင်ရာ ပြည်ထောင်စု အဆင့်အဖွဲ့ အစည်းဝင်များက ရှင်းလင်းတင်ပြရာတွင် ထည့်သွင်းပြောကြားခဲ့ခြင်းဖြစ်ကြောင်း သိရသည်။

နိုင်ငံတော်ဘတ်ဂျက်မတည် ငွေကျပ် ၁၀ သိန်းစီနှင့် အလှူရှင်များ၏အကူအညီဖြင့် ကျေးရွာစာကြည့်တိုက် ၂၀၀ ကို ကျပ်သန်း၂၀၀ ဖြင့် လျာထားပြီး အဆိုပါ စာကြည့်တိုက်များကို အနည်းဆုံး အိမ်ခြေ ၂၀၀ အထက်ရှိပြီး အနည်းဆုံး လူဦးရေ ၁၂၀၀ ရှိသည့် ကျေးရွာကြီးများတွင် ဆောက်လုပ်ခြင်း၊ တိုင်းဒေသကြီး၊ ပြည်နယ်များရှိ လူစည်ကားရာနေရာဖြစ်သော ကားဂိတ်၊ လေဆိပ်၊ သင်္ဘောဆိပ်များ၌ နိုင်ငံတော်ဘတ်ဂျက်ဖြင့် စာပေရေချမ်းစင် Mini Book Corner ၅၀၀၀ ထပ်မံ တိုးချဲ့ပြုလုပ်ခြင်း အပါအဝင် အထက်ပါ လုပ်ငန်းစဉ်များကို ဆောင်ရွက်သွားမည်ဖြစ်ကြောင်း သိရသည်။ 

ယင်းအပြင် ၂၀၁၄ ခုနှစ် မြန်မာနိုင်ငံက အာဆီယံဥက္ကဋ္ဌအဖြစ် တာဝန်ယူစဉ် လက်ခံကျင်းပမည့် အစည်းအဝေးပေါင်း ၃၀၀ ကျော်တွင် ပြည်တွင်း၊ ပြည်ပ မီဒီယာသမားများအတွက် ရုပ်သံသတင်းများ ရိုက်ကူး၍ ပြည်ပနိုင်ငံများသို့ ပေးပို့ထုတ်လွှင့်နိုင်ရန် International Broadcasting လုပ်ငန်းများ ထူထောင်ခြင်းလုပ်ငန်းစဉ်များ အစရှိသည်တို့ကိုလည်း ဆောင်ရွက်သွားမည်ဖြစ်ကြောင်း ပြည်ထောင်စုဝန်ကြီးက ပြောကြားခဲ့သည်ဟု သိရသည်။

ထို့အတူ စာပေဗိမာန်ဌာနကို Semi Government Organization အဖြစ် ပြောင်းလဲဖွဲ့စည်း၍ ပုဂ္ဂလိကနှင့် အစိုးရပူးပေါင်းပြီး ဘာသာပြန်လုပ်ငန်းများ အရှိန်အဟုန်မြှင့်တင် ဆောင်ရွက်ခြင်း၊ ပုံနှိပ်စက်ဟောင်းများနေရာတွင် ပုံနှိပ်စက်သစ်များ အစားထိုးလဲလှယ်ရန် ဖိုသိုလစ်သိုစက်ရုံအတွက် Sheetfed Offset 4 unit တစ်လုံး၊ ဗဟိုပုံနှိပ်စက်ရုံအတွက် ကွန်ပျူတာအသုံးပြု၍ ပလိပ်ပြားပေါ်တွင် တိုက်ရိုက်အရောင်ခွဲ ပုံဖော်စက် Computer To Plate (CTP) တစ်လုံးဝယ်ယူခြင်း လုပ်ငန်းစဉ်များကို ဆောင်ရွက်သွားမည်ဖြစ်ကြောင်း အစရှိသည်ဖြင့်လည်း ထည့်သွင်းပြောကြားခဲ့ကြောင်း သိရသည်။

Credit to-

myanmarmobile app

Posted in: နည်းပညာသတင်းများ, သတင်း