တရားဝင်မဟုတ်သော Huawei ဟန်းဆက်များ ပုံစံနှစ်မျိုးဖြင့် ဈေးကွက်အတွင်း ဝင်ရောက်

 ဟန်းဆက်အဟောင်းများကို အသစ်အနေသို့ ရောက်ရှိအောင် ပြင်ဆင်၍သော်လည်းကောင်း၊ အခြားသော နိုင်ငံများအတွက် ထုတ်လုပ်ထားသည့် ဟန်းဆက်များကို မြန်မာနိုင်ငံသို့ တင်သွင်းခြင်းဖြင့်လည်းကောင်း ပုံစံနှစ်မျိုးဖြင့် တရားမဝင် Huawei ဟန်းဆက်များ ဈေးကွက်အတွင်း ဝင်ရောက်နေသည်ဟု သိရသည်။



အခြားသော နိုင်ငံများအတွက် ထုတ်လုပ်ထားသော ဟန်းဆက်များကို အသုံးပြုသည့်အခါ မြန်မာနိုင်ငံ၏ Network နှင့် ကိုက်ညီမှုမရှိဘဲ အခက်အခဲများ ကြုံတွေ့ရပြီး အဟောင်းကို အသစ်ကဲ့သို့ ပြုပြင်ထားသော ဟန်းဆက်များကို အသုံးပြုသည့်အခါ အရည်အသွေးပိုင်းနှင့် ပတ်သက်၍ ပြဿနာများကြုံတွေ့ရကြောင်း Huawei Device Manager ဖြစ်သူ Cloudy Jiang က ပြောသည်။

တရားမဝင် Huawei ဟန်းဆက်များ ဝင်ရောက်လာခြင်းနှင့် ပတ်သက်၍ Huawei မှ တရားဝင် ဖွင့်လှစ်ထားသော Service Center များသို့ လာရောက်ပြင်ဆင်မှုများ ကြုံတွေ့လာရသည့်အတွက် ကုမ္ပဏီအနေဖြင့် သိရှိခဲ့ခြင်းဖြစ်ပြီး တရားမဝင် တင်သွင်းလာသော ဟန်းဆက်များကို တားဆီးမှုများ ပြုလုပ်သွားမည်ဟု ၎င်းကပြောသည်။

“Huawei Service Team ကနေပြီးတော့လည်း အချိန်နဲ့တစ်ပြေးညီ စစ်ဆေးနိုင်တဲ့ နည်းလမ်းတွေကိုလည်း ဖော်ပြလျက် ရှိပါတယ်” ဟု Cloudy Jiang ဆိုသည်။
လက်ရှိအချိန်၌ Huawei သည် တရားမဝင် တင်သွင်းလာသော ဟန်းဆက်များနှင့် တရားဝင် တင်သွင်းထားသော ဟန်းဆက်များကို အသုံးပြုသူများ ခွဲခြားနိုင်ရန် နည်းလမ်း ၅ မျိုးကို ဈေးကွက်အတွင်း ကြေညာမှု ပြုလုပ်ခဲ့သည်။

လက်ရှိအချိန်၌ ဈေးကွက်အတွင်း အောင်မြင်နေသည့် Huawei ၏ Honor 4A၊ Honor5X၊ Honor 4၊ Honor 7၊ Honor 7i နှင့် Honor Enjoy 5S တို့သည် မြန်မာနိုင်ငံ အတွက် Huawei အနေဖြင့် တရားဝင် တင်သွင်းထားခြင်း မဟုတ်ကြောင်း၊ အခြားနိုင်ငံများတွင်သာ ရောင်းချသည့် ဟန်းဆက်များဖြစ်သည့်အတွက် မြန်မာနိုင်ငံရှိ Network များနှင့် ချိတ်ဆက်ရာတွင် အဆင်မပြေမှုများ ကြုံတွေ့နိုင်ကြောင်း Huawei က ကြေညာခဲ့သည်။

credit MMAS 
www.thihahtike.com
သီဟထိုက်

Posted in: နည်းပညာသတင်းများ