ဆက်သွယ်ရေးကဏ္ဍတွင် edotco က အမေရိကန်ဒေါ်လာ သန်း ၂၀၀ ရင်းနှီးမြှုပ်နှံမည် ဟုဆို

ဆက်သွယ်ရေးတာဝါများကို တည်ဆောက်သည့် edotco သည် လာမည့် ငါးနှစ်အတွင်း မြန်မာနိုင်ငံ၌ အမေရိကန်ဒေါ်လာ သန်း ၂၀၀ ခန့် ရင်းနှီးမြှုပ်နှံသွားမည်ဖြစ်ပြီး လာမည့် ၃ နှစ်တာ ကာလအတွင်း တာဝါတိုင်ပေါင်း ၅ ထောင်ကိုလည်း စိုက်ထူသွားမည်ဟု ယနေ့ကြေညာခဲ့သည်။

edotco သည် Myanmar Tower Company တွင် Digicel ပိုင်ဆိုင်သည့် ရှယ်ယာ ၇၅ ရာခိုင်နှုန်းကို ဝယ်ယူ၍ မြန်မာနိုင်ငံ ဆက်သွယ်ရေးကဏ္ဍသို့ ၀င်ရောက်လာခဲ့ခြင်း ဖြစ်သည်။ ၎င်းတို့ရှယ်ယာ ၂၅ ရာခိုင်နှုန်းကို Yoma Strategic Company က ပိုင်ဆိုင်ပြီး လက်ရှိအချိန်၌ တာဝါတိုင်ပေါင်း ၁,၂၅၀ ကို Myanmar Tower Company ထံမှ ပြန်လည်ပိုင်ဆိုင်ထားသည်။

၎င်းတို့တည်ဆောက်ခဲ့သည့် တာဝါများကို ဆက်သွယ်ရေး အော်ပရေတာတစ်ခုဖြစ်သည့် Ooredoo က အသုံးပြုခဲ့ခြင်းဖြစ်ပြီး ထပ်မံတည်ဆောက်မည့် တာဝါများအတွက် အခြားသော ဆက်သွယ်ရေး အော်ပရေတာများ ဖြစ်ကြသည့် Telenor နှင့် MPT တို့ပါ အသုံးပြုရန် ချိတ်ဆက်ထားကြောင်း ကုမ္ပဏီက ထုတ်ပြန်ကြေညာခဲ့သည်။

တည်ဆောက်မည့် တာဝါအများစုသည် မြေစိုက်တာဝါများဖြစ်ပြီး အနည်းငယ်သော ပမာဏမှာ အထပ်မြင့် အဆောက်အဦများပေါ်၌ တည်ဆောက်သွားမည်ဟု edotco မှ CEO ဖြစ်သူ Mr. Suresh Sidhu က ဆိုသည်။ edotco သည် အမေရိကန်ဒေါ်လာ ၂၂၁ သန်း အကုန်အကျခံ၍ အစုရှယ်ယာ ၇၅ ရာခိုင်နှုန်းကို ဝယ်ယူကာ မြန်မာနိုင်ငံ ဆက်သွယ်ရေးဈေးကွက်သို့ ဝင်ရောက်လာခဲ့ခြင်းလည်း ဖြစ်သည်။

Edotco ကို ၂၀၁၂ ခုနှစ်က တည်ထောင်ခဲ့ခြင်းဖြစ်ပြီး မလေးရှား၊ ဘင်္ဂလားဒေ့ရှ်၊ ကမ္ဘောဒီယား၊ သီရိလင်္ကာနှင့် ပါကစ္စတန် စသည့်နိုင်ငံများတွင် တာဝါတိုင်ပေါင်း ၁၅,၀၀၀ ဖြင့် လုပ်ငန်းလည်ပတ် လုပ်ကိုင်နေကြောင်း သိရသည်။


credit  internetjournal
www.thihahtike.com 
သီဟထိုက်

Posted in: နည်းပညာသတင်းများ